01 يناير 2010

الطيران بدون أجنحة

 الطيرانُ بدونِ أجنحة 



من قالَ أنّ الطيرانَ يحتاجُ إلى أجنحة؟!

قديماً شاهدَ الإنسانُ الطيورَ، وطافَ بخيالهِ هذه السماء، وتمنى لو يستطيعُ هو الآخر أن يحلـّقَ مثلها بحريةٍ أكبرَ من تلك التي يحظى بها على الأرض.

حاولَ وضْعَ الريشِ عليه، وصنعَ الأجنحة، لكنه فشل. حاولَ القفزَ من المرتفعات، حاولَ ركوبَ الريحِ، وأيضاً فشل.

ومع ذلك، فقد حاولَ مجدداً لكن بتفكيرٍ جديد، فلقد عَلِمَ أنه ليس طائراً، وأنه لا يملكُ أجنحة، وليس من الضروري أن يملكَ تلك الأجنحة ليتمكنَ من الطيران، ولذلك صنعَ الطائرة.


عندما تظنُّ أنّ الأمورَ أضحتْ مستحيلة، فكّر بطريقةٍ مختلفة.






شكر


أول بوست في 2010
احترت أختار إيه أكتبه عشان نبتدي بيه السنة
واخترت الموضوع ده
لأن الطيران حلم كل إنسان
مش مجرد الطيران في الهوا
وإنما حلم الحرية
حلم النجاح
حلم السعادة
كل ده زي ما تكون بتطير في السما

وكمان بعض الناس ممكن يخلوك تطير
بيكونوا جناحات ليك ويساعدوك
أنا بشكر كل شخص علمني أي شئ مفيد
وبشكر كل شخص ساعدني أو دعمني
بشكر كل صديق مخلص وكل قريب جيد
بشكر زوّار المدونة الكرام جميعاً
وبختص بالشكر بعض الأشخاص اللي نوروا المدونة بتعليقاتهم
وشاركوني وتفاعلوا معايا

سكرة
 منونة

دول كان ليهم تفاعل كبير في المدونة
وذكرهم لا يقلل من قيمة أي شخص آخر علـّق هنا
وإنما أنا حسيت إن دول من أكتر الناس اللي دعموني
شكراً ليهم
أي حد تاني أنا ماكتبتش اسمه أنا بشكره برضه

بتمنى السنة الجديدة تكون سنة سعيدة عليا وعلى الجميع
أرجو إني أكتب حاجات مفيدة ليا ولغيري
أرجو إذا كنت وصلت لمستوى معين إني أزيد وأبقى أحسن
وأرجو من زوار المدونة إنهم ما يبخلوش عليا بتعليقاتهم
ويقولوا اللي في نفسهم
من حقكم تقروا كلام كويس ومحترم وعلى مستوى عالي
ومن حقي إنكم تنبهوني لأي شئ غير مناسب مخدتش بالي منه

شكراً ليكم

أحمد فايز


هناك 7 تعليقات:

sookra يقول...

دكتور احمد
كل سنه وراسك بخير دايما ودايما لقدام على طول ونقرالك حاجات اجمل واجمل فى 2010
يارب تكون بخير
وبصراحه اثرتنى بشكرك دا معنى انى موش استاهل اى شكر لان ببساطه لو كتاباتك موش اثرت فيا ولاحركت مشاعرى لاكنت هتفاعل ولاحاجه يعنى الشكر ليك انت موش ليا انا
شكرا لانك هنا
هابى نيو يير

winner يقول...


كل عام و أنتِ بخير.
الشكر واجب.
و أرجو فعلاً إني أكون قدمت شئ ممتع و مفيد.

enlightened يقول...

يا رب دايما ...

winner يقول...

"Blogger enlightened يقول...

يا رب دايما ..."


منوّر

لماضة يقول...

لا مش مستحيل
بس المهم الجناح يكون سليم عشان نقدر نطير
الجناح هنا مقصود بيه حاجات كتير
قلب وعقل وظروف وحلم
او على الاقل ميكونش فيه عصايه تكسر جناحك ده

winner يقول...



لا لا لا مش معقول.
دكتورة لماضة هنا!
و أنا أقول المدونة نورها زاد كدة ليه.

بمناسبة الجناحات.
أنا مابحبش الشخص اللي يكسر جناحه و يقعد جنبه يتفرج عليه و يعيط.
جناحاتنا موجودة عشان تتكسر و نوديها للدكتورة لماضة تجبسها و نرجع نطير من تاني.

هي الدنيا كدة حاجات تتكسر و حاجات تتبني، و حاجات تظهر و حاجات تختفي.

المهم ما نفقدش الأمل إننا في يوم هنطير.

winner يقول...

أنا حاسس إني بحب الطيران .. بس بخاف من المرتفعات!
عاوز أركب طيارة .. بس الموقف له رهبة.
لكن لكل شئ مرة أولى.


سبحانك اللهم وبحمدك، أشهد ألا إله إلا أنت، أستغفرك وأتوب إليك