04 يناير 2010

كيف تجعل مدونتك تجذب القرّاء

كيف تجعل مدونتك تجذب القرّاء


طبعا كل مدوّن عاوز مدونته تبقى كويسة و تجذب القرّاء و تبقى من المدونات اللي بيتردد عليها عدد كبير من الزوّار.
أنا قريت مواضيع كتير عن عمل مدونة جذابة، و كمان من خلال تجربتي و فكرتي عن شكل المدونة المحبب، طلعت بكام نقطة أنا شخصياً أحب أشوفها في أي مدونة هقراها، مواصفات تخلي المدونة شيقة و جذابة.

1- الشكل العام للمدونة:
المدونات اللي ليها تصاميم غريبة مش بتجذب حد.
المدونات اللي خلفيتها سودة مش بتعجبني أنا شخصياً، متعبة للعين و كئيبة.
المدونات الملخبطة و مش مرتـّبة بتبقى مملة.
المدونات المعقدة المليانة بحاجات كتير قوي بتبقى متاهة و زحمة.

2- المدونة التقيلة:
تقيلة في التصفـّح. فيه مدونات بيكون فيها (wedget) عبارة عن فلاش. الفلاش بيتقل تحميل صفحة المدونة. المدونات التقيلة بتبقى مملة و بتزهق الواحد. و عشان كدة اللي هيحط حاجة فلاش في مدونته يراعي إنها ماتبقاش كتير، و ماتتحطش في أول المدونة، و كل شخص يختار الأدوات المهمة، و ملوش لازمة الحاجات الكتير اللي محطوطة عشان زي باقي المدونات و خلاص.
الصور برضه بتتقل المدونة. حجم الصورة لازم يبقى مناسب. 
الصور الموصولة بلينك بتتحمل أبطأ من الصور المرفوعة على بلوجر. 
امتدادات الصور بتفرق في حجمها، الصور JPEG بتكون خفيفة. 
حجم الصور بالبيكسل بيأثر على تحميلها، حجم 400×400 (أو الحجم المتوسط) ممكن يبقى مناسب للمواضيع، و حجم 200×300 ممكن يبقى مناسب للشريط الجانبي.

3- المواضيع:
المواضيع التافهة ما بتجذبش معظم الناس.
المواضيع الشخصية من الحاجات المهمة في المدونات. المدونة الشخصية زيادة عن اللزوم اللي بتحكي عن شخص و بس بيكون ملهاش قيمة كبيرة عند معظم المتصفحين اللي مايعرفوش صاحب المدونة أصلاً.
المدونات اللي عبارة عن (واحد أو وحدة بيحب على نفسه) من الحاجات المنفرة جداً. كل شئ له مقدار مناسب بيخليه جميل، إنما الحب الأوفر ده اللي سايح في المدونة خالص ما بيعجبنيش أنا شخصياً، و إن عجب حد بيبقى حد برضه ماشي يحب على نفسه و مش هتستفيد قوي منه كمدوّن هيستفيد من آراء الزائرين.
المواضيع اللي عبارة عن (توزيع اكتئاب)، و اللي صاحبها مابيكتبش عن حاجة غير عن مأساته في الحياة بتكون منفرة جداً برضه، محدش عاوز يخش يلاقيك كاتب في مدونتك الكم ده من النكد، الناس أصلاً مش ناقصة نكد. ممكن تحتفظ بالهموم العظيمة لنفسك و اعتبرها من خصوصياتك. الفضفضة مفيش منها مانع لكنها ما تبقاش الطابع العام للمدونة.

المواضيع اللي بتناقش قضايا عامة، أو لها تصنيف محدد (أدبية، سياسية، دينية) من أنجح المواضيع و أكثرها قبولاً.

مصداقية الكاتب في كتاباته من أهم الأشياء لنجاح المدونة، لأن مصداقية الكاتب بتدي ثقة في الكاتب و تحفز القارئ إنه يكمل قراية و يرجع للمدونة تاني.

المواضيع (الملطوشة) بتخلي صاحب المدونة يسقط من النظر. إذا لقيت صاحب مدونة ناقل موضوع في مدونته و ناسبه لنفسه ده شئ بيضايق أي حد لإنه فعل قبيح جداً، و مابفكرش أرجع للمدونة دي تاني، دا يمكن حتى أبلـّغ عنه.

4- التنسيق:
الموضوع المكتوب بخط مناسب (4 مثلاً أو خط كبير) أفضل بكتير من الخطوط الصغيرة المتعبة في القراية. الخطوط الضخمة برضه مش كويسة. الوسطية حلوة.

الألوان المناسبة شئ مهم. لازم اللون يكون متناسق مع الخلفية. يعني مثلاً لون أحمر مع خلفية سودة شئ غير متناسق تماماً و متعب للنظر.

الصور في المواضيع شئ جذاب. بس ماتكونش كتير. و تكون في محلها و معبرة عن الموضوع مش مجرد صور و خلاص.

استخدام اللغة الصحيحة الواضحة، و تنسيق النص من الأشياء الجذابة اللي تخلي القارئ يكمل قراية الموضوع.

5- مدونتك جزء منك:
المدونة مش مجرد مكان بتكتب فيه. المدونة دي زي بيتك، شكلها و مضمونها بيدل عليك. محتوى المدونة هو انت.
تفكيرك و اتجاهاتك بتظهر في كتاباتك. و عشان كدة كل مدون لازم يراعي إنه يكتب شئ له قيمة يعبر عنه.
المدونة مش مكان شخصي على الاطلاق, يعني ماينفعش حد يكتب اللي هوه عاوزه في مدونة و ينشرها على الملأ. مجرد نشرك للمدونة بيلزمك بالتقيد بالأصول و التقاليد. مش تكتب اللي في مزاجك، عاوز تقلع هدومك و تستحمى يبقى عندكوا في البيت مش في الشارع.

دي حاجات في اعتقادي إنها مهمة لكل مدوّن.
يمكن لو افتكرت حاجة تانية أبقى اكتبها.
و اتمنى للجميع إنهم يمتلكوا مدونات جذابة و مفيدة.


أحـمـد فـايـز

هناك 4 تعليقات:

sookra يقول...

ازيك يادكتور
عاجبنى موضوعك
بس ممكن اسالك عن رأيك فى مدونتى
اعتقد انى من الناس اللى بتنشر الاكتئاب ولاايه رايك
نور المحكمه

winner يقول...


فعلا انتي عندك شوية اكتئاب في المدونة.
بس أنا شايف إن فيه تحسـّن.
لكن أكتر حاجة متعبة هي اللون الأسود في المدونة.
اللون الأسود كخلفية و خاصة في الكمبيوتر من الحاجات المتعبة للنظر, و كمان أنا مابحبش اللون الأسود قوي.

Shaimaa يقول...

ليا تعليق شخصى بسيط يا أحمد ياريت تسمحلى أقوله...
أنا شايفه ان المدونات متعملتش أبدا للقراء ... فكرة التعليق دى اختيارى ومستحدثة ... هوه الواحد فى الأساس بيبقى عايز يتكلم مع نفسه ... أو حتى يمكن تعبان من حاجة ومش عاوز يتعب اللى حواليه بأى فضفضة .. أو يمكن مش لاقى حد يفهمه أوى ..أو ..أو...الخ
فبدل ما يمسك ورقة وقلم ويكتب .. بيفتح صفحة على الكمبيوتر "ويفضفض" .... لو كانت المدونة كئيبة فأنا غير مطالبة ان أتصفحها اطلاقا ...زى بالظبط ريموت التليفزيون معمول علشان أستعمله فى حالة انى مش راضية عن المسلسل أو البرنامج ده..فبقلب عليه ومش بتابعه تانى اطلاقا
المدونة أداة تنفيس عن جيل كامل مش لاقى منفذ واحد يعبر فيه عن رأيه
آسفة طولت عليك بس ده رأيى الشخصى

winner يقول...



أنا متفق معاكي تماماً إن المدونة مكان هايل للفضفضة و للتواصل مع الآخرين.

لكن، هل المدونة مكان شخصي؟
هل يمكن كتابة كل شئ في المدونة؟

فيه مدونات للمدعوين فقط و دي بتسمح لأشخاص معينين بتصفحها. و دي بتوفر قدر كبير من الخصوصية. لكن المدونة العامة صاحبها قرر إنه يسمح للناس بقراءة كل شئ بيكتبه، و إذا ساب التعليقات مفتوحة فيبقى هو سمح بالتعليقات، فبالتالي المدونة مش مكان شخصي الواحد يقدر يكتب فيه اللي هو عاوزه.

أنا مش بتكلم عن الكآبة و لا الحزن في المدونات، ما كل الناس عندها همومها، إنما الفكرة في حالة القنوط و العويل اللي أحياناً بقرأها في مدونات، بتحسسني إن الناس دي بتهوّل الأمور أو إيمانها بربنا مش بدرجة مناسبة، لأنه لو كان إيمانها سليم ماكانوش جهروا بشكوتهم من كل شئ في حياتهم، و كأنهم بيشتكوا ربنا و هم مش قاصدين.
(و مش بتكلم عنك يا سكرة .. إنتي كلامك بسيط بالنسبة لحاجات كتير قريتها لناس تانية .. و لا انتي برضه يا شيماء).

نفس الفكرة في المحتويات الغير مناسبة. زي ما ناس لقيتها كاتبة كلام أقل ما يقال عنه إنه (قلة أدب). و يسموه كذباً شعر أو أدب، و الشعر و الأدب برئ مما يكتبون. و الناس دي معتقدة إن من حقهم يكتبوا ده و اللي مش عاجبه ما يقراش، ما انت عارض الكلام ده في مدونة عامة، يعني عاوز تطلع من بيتكوا عريان و تقول اللي مش عاجبه مايبصش!

الخلاصة إن أي مدوّن لازم يراعي إن المدونة معروضة للجميع لقراءتها و بالتالي عليه احترام الناس و مراعاة القواعد و القيم.


سبحانك اللهم وبحمدك، أشهد ألا إله إلا أنت، أستغفرك وأتوب إليك