25 يناير 2010

عم الشيخ



 عم الشيخ 


"انت عارف مين اللي هيدلك على مكان الجاموسة؟!
الشيخ عفيفي.
الشيخ عفيفي دا سرّه باتع".

"وماله.
نروحله".

"السلامو عليكو يا عم الشيخ".

"وعليكم السلام يابني".

"احنا يا عم الشيخ كنا قاصدينك عشان تعرفلنا مين اللي سرق الجاموسة بتاعة محروس".

"بس استنو...
أنا هقولكو انتو جايين ليه.
جاموستك اتسرقت يا محروس مش كدة؟!".

"الله أكبر.
تمام كدة يا عم الشيخ".

"طيب يابني.
احنا هنعوز منك حبة طلبات كدة.

مش عشاني دي عشانهم.
والحاجات دي تجيبها معاك بكرة".

"حاضر يا عم الشيخ.

حاجات إيه اللي عاوزينها؟".

"تجيب معاك شهادة الميلاد، وصورة البطاقة.
وتجيب وجبة فراخ كنتاكي.
ومعطر جو فريش.
وعاوزين 5 كيلو رز وكيسين مكرونة.
وسي دي ألبوم نانسي الجديد".

"مش عاوزين صابون بريحة يا عم الشيخ؟!".

"لا يابني، بيستخدمو شاور جيل!
وما تنساش تجيب معاك حاجة من أتر الجاموسة".

"حاجة زي إيه يا عم الشيخ؟".

"يعني شعراية، صورة!".

"حاضر يا عم الشيخ".


(تاني يوم)

"أنا جبت الحاجات اللي قولت عليها يا عم الشيخ".

"أوعى تكون نسيت ألبوم نانسي!".

"لا يا عم الشيخ، جبت السي دي".

"بص يابني.
أنا هقولك شوية معلومات عنك عشان تتأكد إني شيخ بجد وحقيق مش هزار.
انت اسمك محروس.
ومولود سنة 80.
مولود في عزبة النخل".

"الله عليك يا عم الشيخ، صح".

"أبوك اسمه مرسي.
والجاموسة بتاعتك لونها اسود!".

"تمام يا عم الشيخ.
دا انت جامد قوي!".

"طيب انت تعدي عليا كمان أسبوع أكون عرفتلك مين اللي سرق الجاموسة".


(بعد أسبوع)

"ها يا عم الشيخ.
مين اللي سرق الجاموسة؟".

"للأسف يابني، اللي سرق الجاموسة بتاعتك جماعة النينجا المقنّعين وهم دبحوها وباعو لحمها وخدو الفلوس وهربو برة البلد.
معلش يابني، ربنا يعوّض عليك".

"يا حول الله يا رب.
طب يا عم الشيخ، أجرة إيدك كام؟".

"أجرة إيدي!
هو أنا حلاق!
أنا مابخدش فلوس يابني.
بس هم عاوزين 500 جنية هدية، و200 جنية مواصلات، و50 جنية بدل أكل، و10 جنية دمغة".

"مش كتير كدة يا عم الشيخ؟!".

"وأنا مالي يا بني.
دول هم اللي عاوزين.
وانت عارف ماقدرش أقولهم لأ.
دول ممكن يأذوك.
بس أنا ممكن أكلمهم يخفضوا الفلوس شوية.
خلاص يابني هم شالو الـ10 جنية دمغة عشان خاطرك انت بس".

"كتر خيرك يا عم الشيخ.
الله يباركلك.
كتر خيرك".
!!!


(للجهل والنصب في بلادي شئون)




أحمد فايز 


 

هناك 8 تعليقات:

Shaimaa يقول...

أو يمكن معنداش لاقيين قانون صح يحمينا ويجيبلنا حقوقنا
أو معتش فى طب صح يشخص مرضنا ويعالجنا

ويمكن الطب بقى تجارة ...فتجارة بتجارة بقة نروح لعم الشيخ

winner يقول...




شيماء.

القانون لا يحمي المغفلين.
اللي بيروحوا للدجالين عارفين إنهم دجالين و برضه بيروحوا.

اللي مش هيجيبه القانون مش هيجيبه الدجالين، و اللي مش هيعالجه الطب مش هيعالجه الدجالين.

sookra يقول...

والله دى بقت حاجه تغم وتكسف
عندك حق يادكتور احنا كلنا لازم ندور على شيخ يغيرلنا كل الواقع دا
شيخ ايه بس ياسكره احنا اللى المفروض نغير ونتغير ومنستناش حد يساعد ولايمد ايديه ويخدعنا
هو انا بقول ايه
على العموم اعذرنى لانى غايبه الفتره دى لكن متابعاك وعاجبتنى فكره المجله بس انا ماليش فى الكتابه الادبيه وعشان كدا لن استطيع ان اشارك
اما موضوع الاسود
فانا اعشقه ولم استطع ان ارى مدونتى بلون غيرها ولذلك رجعت للاسود تانى
مساك شيكولاته

winner يقول...



سكرة.

ربنا يجعل في غيابك خير، و ييسر لك الأمور.

سيبك من الأسود بقى و شوفي الدنيا بنضارة ألوانها أفتح. فكّري بشكل أكثر إيجابية و تفاؤل، و استمتعي بالحياة حتى و لو كانت آخر قطرة في الكوب.

حالك حال ناس كتير قوي مش قادرين يشوفوا جمال الحياة عشان كل الوحش اللي فيها، و أنا برضه عندي في حياتي هم و غم كتير، بس عوّدت نفسي إني برغم كل شئ لازم أعيش و استمتع و افرح و اشوف اللون الجميل وسط الألوان الكتير الكئيبة.

السعادة شعور داخلي قادر على البقاء رغم كل شئ، و لا يمنعنا من السعادة سوانا.
مش كلام و خلاص، لكن جربي تستمتعي و هتعرفي الفرق.


Shaimaa يقول...

اللى بيوصل الناس دى لكدة "الاحبـــــاط" وفقدان الأمل
وأظن ان فى حاجات كتير فى مصر معدتش بخير ولا ايه؟؟؟!!!!!!!!!!!!

мαησηα يقول...

اممممم .. كنت هاحكى عن الموضوع ده حكاية بس كالعادة كسلت فا انت سبقتنى هههه

ف بيتها ..

مش عارفة اقولك ايه ؟ بس بجد الموضوع ده بقه بزيادة حبتين تلاتة اربعة ..

الناس بقت بتتجوز بيه الموضوع ده كمانهاتجوز دى علشان الشيخ قالى كذا ..

سبحان الله لو كل واحد فكر ان الاستعانة باللى بيتسموا شيوخ حتحل مشاكله

كان فكر فان الشيخ ده مثلا ليه مبقاش رئيس جمهورية بلاش كان ملك العالم واتحكم فيه مدام هو مكشوف عنه كل شئ

سبحانك يارب

كذب المنجمون ولو صدقوا

بحب اجى عندك واقرأ مش بعلق كتير عارفة بجيبلك احباط بس بيعجبنى اسلوبك اوى ومش برضى اعلق لان مابيبقاش عندى كلام اقوله غير بجد رائع

دمت رائع يا ابو حميد

winner يقول...




شيماء.
أنا أتفق معاكي لو قلتي الاحباط أو اليأس أو الظروف أو حاجات كتير ممكن تدفع الناس إنهم يستعينوا بالأشخاص دول.

لكن ده مش مبرر.
مفيش حاجة تبيح الغلط ده.

تصديق الدجالين و السحرة كُفر.

أنا معاكي إننا نراعي ظروف الناس و نتفهّم موقفهم، لكن في نفس الوقت لازم نقول إن ده غلط كبير قوي ما ينفعش السكوت عليه. لازم نكون أقوياء في مواجهة الأخطاء الجسيمة مش مجرد إننا نعزي الأمر للأسباب.


شكراً للنقط اللي طرحتيها في التعليقات، خلتنا نكتب في الموضوع أكتر و نتناقش فيه.


winner يقول...



معلش يا منونة سبقتك :)
خيرها في غيرها

و تشرفي وقت ما تحبي، و ننتظر رجوعك بعد ما تغيبي عننا.

من الحاجات المهمة اللي انتي قولتيها، الشيخ ده لو بيفيد حد كان فاد نفسه، إنما تلاقيهم ناس معفنين و مش لاقيين ياكلوا.
ما كان عمل قرشين و اشترالوا دولة محندقة كدة في أي حتة!



سبحانك اللهم وبحمدك، أشهد ألا إله إلا أنت، أستغفرك وأتوب إليك