26 يناير 2010

دي مش كورة


دي مش كورة
(مصر و الجزاير .. كلاكيت عاشر مرة)


في البداية أحب أحط قاعدة عريضة نبتدي بيها الكلام

[ أنا بحب كل خلق الله لأنهم خلق الله
بحبهم من غير ماعرفهم
بشر و لا حيوانات أنا بحبهم ]
اللي بيفرق بعد كدة هو تصرفات الناس و أفعالهم
يعني أنا ما بكرهش الأمريكان و خلاص
لأن فيه أمريكان محترمين
و فيه أمريكان مسلمين
فيه أمريكان كتير معارضين سياسة أمريكا و ياما عملوا مظاهرات

أنا مش بكره اسرائيل و خلاص
أي حد قاعد في اسرائيل يبقى راضي عنها و عن اللي بتعمله
(ماقصدش العرب اللي قاعدين هناك في أرضهم)
اسرائيل كلها على بعضها كدة تتكره
مش عشان يهود
و لكن عشان أفعالهم اللي تخلي أي حد يكرههم

أنا مابكرهش الجزائر و لا أهلها
بالعكس
من أجمل قصص الكفاح الشعبي قصة أهل الجزائر
بس أنا مابحبش التفاهة و التافهين و الأغبياء بمزاجهم
أيـّا كانت ملـّـته
مابحبش الشخص اللي عاوز يأذي شخص زيه عشان حاجة ما تستاهلش
عشان كورة
كورة إيه يا جدعان اللي تخلي الناس تزعل من بعض !
مجرد زعل مش ضرب و لا قتل
الكورة دي مش كانت حاجة للترفية و رياضة !
ليه اتقلبت خناقة و حرب ؟!

أنا برضه مابحبش المصريين اللي عايشين عشان الكورة و فاكرين إنها الأمل
و ناس تقول إن دي الحاجة الوحيدة اللي بتفرحنا في البلد دي
طب و انت عملت إيه عشان تلاقي حاجات تانية تفرح بيها ؟!
الواضح إنك تلاقي الشخص اللي بيعيش و يموت عشان الكورة شخص تافه بطبعه
شخص فاشل مش لاقي حاجة تانية يعملها
عمركوا شوفتوا حد ناجح بيتخانق عشان الكورة !
لو شوفتوا فكروا تاني لإن ده مش ناجح أبداً
الكورة واخدة أكتر من حقها
و الملايين اللي بتتصرف عليها كان الأولى تتصرف على الشعب المسكين اللي تحت خط الفقر
كان الأولى يتبني بيها مستشفيات و مدارس و مساجد
كان الأولى نسد بيها الدين الداخلي و الخارجي
نصلـّح البنية التحتية الخربانة
نبني مصانع ونستصلح أراضي
عشان نلاقي حاجة حلوة في البلد
حاجة نفرح بيها بجد
مش كورة
!!

إيه المشكلة و فين المشكلة ؟؟

المشكلة إن الناس اتلهت في حاجة خايبة عن حاجات مهمة
مفيش مانع نتفرج على الكورة و نتبسط
و نشجع نادينا و منتخبنا
بس بالاحترام و الذوق
بالأدب و الأخلاق
و من غير ما يكون ده على حساب ديننا و لا وقتنا و لا أهلنا
و الكلام للكل

أنا مش راضي إطلاقـاً عن اللي حصل بين المصريين و الجزائريين
عشان إيه كل ده ؟!
كورة و لا كاس عالم !!
كاس عالم إيه بس اللي عاوزين ناخده
ما نعمل الأول الاتحاد العربي و لا السوق العربية
و لا حتى نزرع قمح يكفينا بدل ما بنستورد لقمة العيش يا مؤمنين
تلاقي الواحد من دول متعصب قوي و متحمس قوي
طب خلي حماسك ده في شغلك
في تربية ولادك 
المجتمع اتملى بجيل ما يعلم بيه إلا ربنا
أغنية توديه و أغنية تجيبه
العيال حافظة أغاني نانسي و جوجو جوجو
و تلاقيهم مش عارفين النشيد الوطني
جيل ماتش يوديه و ماتش يجيبه
مشغولين بالتليفزيون و النت و البلد تضرب تقلب
و الله حرام اللي بيحصل ده

ربنا يهدينا جميعاً
و يا رب نفوق كدة و ندي كل حاجة حجمها اللي المفروض تبقى عليه
و نلتفت للحاجات المهمة و نسيبنا من التفاهات و الحاجات اللي على هامش الحياة
و نشوف أحوالنا و نصلحها 

أوعوا حد يتفرج على الكورة و يشتم الفريق المنافس
لو هم شتموا لازم نبقى احنا أكبر من البذاءة
أوعوا حد يكره حد عشان الكورة
دي خيبة تقيلة مش وطنية
أوعوا حد يفتكر إننا هنبقى أبطال لما نكسب ماتش
البطل اللي يقدر ينجح بشرف و أخلاق
و ما يعيبوش إنه تعثــّر في طريق نجاحه و بطولته
أوعوا حد يتفرج على ماتش و هو شايل هم الدنيا على كتافه و حاسس إن الماتش ده هو الخلاص و هو الحل
اللي بيموت و هو منفعل قوي عشان فريقه خسر و لا كسب
مش عارف ده هيقابل ربنا يقوله إيه !
أوعوا تعلموا ولادكم إن الكورة هي الشعار الرسمي للمواطن المصري
أو الكورة هي الراعي الرسمي للراجل المصري
أوعوا تعلموهم من خلال أفعالكم و أقوالكم إن الدنيا كورة
الدنيا مش كورة




أحــمـد فــايـز


هناك تعليقان (2):

Shaimaa يقول...

آه والله ...دى مش كورة دى مصيبة
لما نسيب وننسى كل حاجة فى الدنيا ونفتكر بس الكورة

لما الاعبين هيرجعوا مصر هياخدوا ملايين مش بس من اتحاد الكورة ..لأ ..ده من رجال أعمال كتير رصدوا ملايين علشان فوز مصر من غير ما حد يطلب منهم ..هما بيتبرعوا كدة لوحدهم

محدش من السادة رجال الأعمال فكر وحس ازاى الستات ببناتهم وولادهم قاعدين فى خيم فى الشارع فى البرد ده فى أسوان وسيناء ..والسادة المسئولين طلعوا فى التليفزيزن وقرروا ان خلاص كل حاجة تمام
انما يطلع رجال الأعمال يقولوا هنبنى مساكن كاملة المرافق للناس اللى فى الشارع دى ... لأ ..ليه؟؟؟ هما مالهم

حتى أيام مشكلة غزة "الأخوان" وغيرهم اتحركوا وعملوا حملات لجمع تبرعات انما فى أزماتنا احنا بنبقى عمى وطرش

وكاه كوم السادة اللى بيدخلوا المنتديات على النت كوم تانى اللى يقولك نسحب السفير واللى يقولك هناخد شومة ونروح أنجولا ...وممكن السادة الدعاة المتخلفين عقليا يطلعوا فتوى برمى الجزائر بالحجارة حتى الموت

احنا عندنا مشكلة "ضمير" ومشكلة فهم للدين غلط جدا..حتى الدين بقى show ودعاية.. ربنا يرحمنا
آسفة على التطويل بس الواحد ضغطه على من الناس الغريبة دى

winner يقول...




قولي اللي في نفسك و فضفضي.

انتي طولتي فعلاً :)

بس الموضوع محتاج تطويل لأنه مهم.

"العقلاء وحدهم من يرون حين يغلقوا أعينهم".




سبحانك اللهم وبحمدك، أشهد ألا إله إلا أنت، أستغفرك وأتوب إليك