08 أبريل 2010

سوق الحياة

 سوق الحياة 



عارفة إية الفرق بين ولاد الفقرا و ولاد الأغنيا ؟

إن ولاد الأغنيا بيتولدوا في التكييف
بيبقوا عاملين زي الأكـلة الباردة
إنما ولاد الفقرا بيتولدوا في حر الدنيا
و يفضل الفقر مولـّع حياتهم
و عشان كدة بيستووا بسرعة

ولاد الأغنيا بيروحو مدارس لغات
و يروحو النادي عشان يلعبوا رياضة
سباحة و تنس
إنما ولاد الفقرا بيتعلموا في الشارع
بيتعلموا يعيشوا
بيتعلموا الدفاع عن النفس في الخناقات كل يوم
بيتعلموا نط الحواجز عشان يعدّوا من مطبات الشوارع و حفرها و هم مروّحين بيوتهم
و بيتعلموا الجري ورا الأوتوبيسات

ولاد الأغنيا معندهمش مشكلة يشيلوا فلوس زيادة في جيبهم للظروف
ممكن يدفعوا فلوس أكتر من المطلوب في حاجة عجبتهم
ولاد الفقرا أصلا ً بيخرجوا بفلوس ماتقضيش الحاجة اللي هم عاوزينها، و يقولوا يارب تحصل معجزة و الظروف تتغير و نقدر نجيب الشئ اللي محتاجينه عشان نعيش بس مش عشان نستمتع بالحياة
و ممكن الواحد فيهم يفضل يفاصل ساعة في حاجة بجنية عشان ياخدها بتسعين قرش!
ولاد الأغنيا دول نوع من الناس و ولاد الفقرا نوع تاني
ما ينفعش يتلموا على بعض
عاملين زي الزيت و المية
ولاد الأغنيا زي الميه المعدنية
و ولاد الفقرا زي زيت أكلهم اللي في الأساس هو زيت عربيات مستهلك
كل عقل بيتكوّن على أساس
و الأساسات المختلفة بتطلع عقول مختلفة
اللي ممكن تشوفيه ضروري ممكن بالنسبالي يبقى رفاهية
و اللي تشوفيه ملوش لازمة و ما يستحقش ممكن بالنسبالي يبقى مهم جداً
حتى لو اتقابلنا في يوم صدفة في طريق مش هقدر أعمل حاجة غير إني أقف على جنب و اوسعلك السكة

عارفة مشكلتنا إية ؟
مشكلتنا إني ابن فقرا و إنك بنت أغنيا
و بتسأليني ليه خايف من الارتباط !





أحــمـد فــايــز


هناك 4 تعليقات:

غير معرف يقول...

هون علي نفسك يا اخي !!

اعتقد لو هي بتحبك ممكن تضحي بكل شئ لاجلك

و ايه يمنع ؟؟
ما يمكن ظروفك تتحسن في يوم من الايام؟؟

فماذا يمنع الفقير ان يكون في يوم من الايام غني ؟؟!!

المهم من هو الرجل التي سترتبط به و ليس ما هي فلوسه ..

(ادم )

محمد عطية يقول...

أنا مش فاهم ليه اللى قبلى علق على أساس إنها مشكلة عاطفية بالنسبالك .

و على كل ، فأنا أوافقك فى الراى التكافؤ المادى من عوامل استقرار الحياة الزوجية.

لا شك أن الحديث علق قبول الرجل على رضى الولى لدينه و خلقه
غير أنى لا أحب أن يكون هناك فارق مادي بين الزوجين ...... ولا يقنعنى كلام الروايات بشأن أن الحب يصنع المعجزات......هراء لا طائل منه.

نصيحتى ألا تفسح لقلبك مجالا للحب قبل أن تكون طبيبا عظيما ، عظيم ماديا و إجتماعيا و علميا و دينيا قبل هذا كله بلا شك.

WINNER يقول...



ادم.
المدونة دي بالكامل مفيهاش حاجة واحدة شخصية بتتكلم عني. أنا كاتب و كل كلامي بيدور حول شخصيات غيري، حقيقية أو خيالية. أنا لا أقحم نفسي في ما أكتب.
أنا بنقل فكرة أو حالة في شكل قصة ممكن أكون بطلها الافتراضي، لكن هذا لا يعني أن القصة حقيقية أو أنا بطلها الحقيقي.

انت عندك وجهة نظر أحترمها جداً.
ربنا قادر يجمع الشمل.
و ممكن اللي فقير النهاردة يبقى غني بكرة. و ممكن الأشخاص يستحملوا بعض لحد ما ربنا يفرجها. فيه أمثلة كدة و بتنجح.
و مفيش أي مانع من ارتباط الأغنياء بالفقراء. (إِن يَكُونُوا فُقَرَاء يُغْنِهِمُ اللَّهُ مِن فَضْلِهِ).

شكراً ليك.

WINNER يقول...



محمد عطية.

أنا أميل لضرورة وجود تكافؤ اجتماعي و مادي.

"ولا يقنعنى كلام الروايات بشأن أن الحب يصنع المعجزات......هراء لا طائل منه"

إلى حد ما أتفق معاك.
الموضوع مش مرتبط بس بواحد و واحدة. ساعة الجد لما الواحد يروح يتقدم رسمي هيتحاسب حساب الملكين و هيُطالب بما يعجز عنه. فالأفضل إنه يجهز الأول و بعدين يفكر يتجوز.
الحب مش بتاع معجزات قوي، لكنه ممكن أحياناً يعمل معجزاية من وقت للتاني.

بالنسبة لحكاية طبيب بقى، فالموضوع كبير قوي، و لنا الله.



سبحانك اللهم وبحمدك، أشهد ألا إله إلا أنت، أستغفرك وأتوب إليك