22 مايو 2010

مصباح عماد الدين

مصباح عماد الدين
(أخو علاء الدين)


لما حد يلاقي مصباح عماد الدين ويلاقي نفسه يقدر يحقق كل اللي هو عاوزه أكيد طلبات الناس هتختلف، لكن المبدأ واحد، وهو إنه يحصل على أكبر قدر ممكن من النفع.

ونشوف الناس ممكن تطلب إيه.

...

إبراهيم، 25 سنة، مصر:

شبيك لبيك، تطلب إيه؟
 
عاوز أكل كتير قوي، وبعدين عاوز أروح السينما، وهاتلي فيلا وعربية وفلوس كتيييير قوي، وعاوز أتجوز واحدة حلوة، أو أي حاجة تلاقيها وخلاص!

...


سعاد، 65 سنة، مصر:
 
شبيك لبيك، تطلبي إيه؟
 
عاوزة أرجع شباب تاني، وعاوزة عريس يكون شباب وحليوة كدة، وعاوزة أكون أحلى واحدة، وعاوزة فلوس كتير كمان.

...


رامي، 7 سنين، مصر:
 
شبيك لبيك، تطلب إيه؟
 
عاوز بسكوت كتييير، وشيكولاتة كتير قوي، عاوز محل لعب، وعاوز كمبيوتر ونت، وعاوز تضرب لي الواد محمود زميلي في المدرسة عشان أخد مسطرتي امبارح!

...

حسين الشيباني، 43 سنة، السعودية:
 
شبيك لبيك، إيش تبغى؟
 
والله أبِّي سيارة فخمة، وقصر وسط الرياض وتاني في كاليفورنيا، ويا سلام لو بيرين بترول، ولا تنسى حسابات البنوك بسويسرا.

...

كارول الطربوشي، 22 سنة، لبنان:
 
شبيك لبيك، شو بتريدي؟
 
تكرم، بدّي أكون مطربة كتير ناجحة، وبدّي أكون جميلة وأجمل واحدة في الدنيا، وبدّي فيلا في فرنسا واتنين في أميريكا، وحياة عيونك لاتنسى الماسات تكون كتير كتير حلوة، وبدّي أتجوز عمرو دياب أو وائل جسار.

...

ديفيد كوهين، 45 سنة، أمريكا:
 
شبيك لبيك، What do you wish ؟
 
آي ويش يكون عندي 2 مول كبار جداً وسط نيويورك، وعاوز مزرعة في تكساس، وقرية سياحية في فلوريدا، و100 كيلو دهب في خزنة في سويسرا، وأكون عضو في الكونجرس، ويكون عندي أكبر شركة اتصالات وتكنولوجيا في العالم، وعاوز جزيرة وسط المحيط الهادي، وعاوزك تخلصني من كل المسلمين والعرب اللي في الدنيا!

...

فن الحياة:
 
اللي جوا دماغك ممكن يفرق كتير معاك في يوم من الأيام، فاحرص إن اللي في دماغك يكون يستحق إنك تحتفظ بيه في دماغك، وسيبك من الأحلام التافهة لأنها لو اتحققت فيبقى انت خسرت أكتر ما كسبت. الفرص الحقيقية في حياتك قليلة، فاوعى تضيعها واستغلها صح.



أحمد فايز

هناك 8 تعليقات:

طالبة مقهورة ..درجة أولى يقول...

انا عاوزة اجة واحدة بس...

عاوزة اغير العالم..وعلبة شوكولاته كادبوري ^_^

بوست مختلف جدا

وعجبتني خلي اللي ف دماغك يستحق تحتفظ بيه ف دماغك..

alo2ah يقول...

اممم
انا بدي اغير العالم .. و أشتري دار الشروق واوزع كتبها على الناس الغلابة من أمثالي طبعا :D
وبس ^^
بوست جميل جدا :)

غير معرف يقول...

ندى...
بوست جميل فعلا ...
بس أنا لو حصل ولقيت مصباح علاء الدين فعلا ،فأنا ماليش غير أمنية واحدة بس ،هي ان الانسان الوحيد اللي انفتح له قلبي وحبيته بكل كياني ....يحس بس بيا مش طمعانة حتى ان أكون جنبه بقية عمري...

WINNER يقول...



رضوى.
حكاية تغيري العالم دي سيبك منها.
خليكي في الشيكولاتة أسهل.
:)

WINNER يقول...



آلاء.
عاوزة حاجتين أصعب من بعض.
:)
شرفتي يافندم.

WINNER يقول...



ندى.
ربنا يوفقك.

تــسنيـم يقول...

إنت مختفي فين؟

لعله خيــر..

طمنّا عليك

WINNER يقول...



تسنيم.
أشكرك على سؤالك.
خير إن شاء الله. الدراسة بس شادة حيلها عليا. الجراحة كاتمة على نفسي :)



سبحانك اللهم وبحمدك، أشهد ألا إله إلا أنت، أستغفرك وأتوب إليك