01 أغسطس 2011

رمضان السنة دي

(Ramadan - By: Reemma3ali)



احترس .. هذه التدوينة بالعامية !


رمضان شهر مميز جداً. كل سنة بيكون مختلف عن السنة اللي قبلها. و مهما كانت عاداتنا الرمضانية متشابهة إلا إن الروح بتختلف من سنة لسنة. رمضان بيتميز بإنه بيرفع أرواحنا لمستوى إيماني و خلقي أفضل من اللي بنكون عليه في أيامنا العادية. فجأة بنتغير من ليلة أول يوم في رمضان، بنحس إننا دخلنا منطقة مقدسة، وقت مميز، حالة فريدة لازم نعيشها بالشكل المناسب. كلنا في رمضان بنحاول نكون أحسن، بنحاول نحس إننا نقدر نكون أفضل، و بنحاول نقرب أكتر من ربنا. بنحس في رمضان إن الجو مختلف، بنمشي في الشوارع و نلاقي الشارع فيه حاجة متغيرة، فيه جاجة جديدة حلوة. النهار مختلف، و الليل مختلف. و كلنا بنعيش الاختلاف ده كل واحد بطريقته.


رمضان اللي فات كتبت 15 موضوع في رمضان عن رمضان. رمضان ده مش عارف إذا كان الوقت هيسمح إني أكتب عن رمضان، و لا الشغل هيشغلني عن إني أحتفل برمضان بطريقة بحبها - الكتابة - و للأسف بقالي فترة بعيد عن الكتابة و الكتابة بعيدة عني. أحب أقول لكل اللي بيتابع المدونة، و كل اللي بيمر عليها بالصدفة، و كل الناس في كل مكان، رمضام كريم، و ربنا يتقبل منا جميعاً عباداتنا و أعمالنا الصالحة في الشهر ده، و ربنا يبارك لنا في أوقاتنا و أعمارنا و أرزاقنا، و ربنا يسعد أيامنا جميعا، و كل سنة و انتم طيبين.




هناك تعليقان (2):

الحسينى يقول...

كل سنة وانت بخير
ورمضان كريم
ومبروك اختيار تدوينتك لكتاب ال 100 تدوينة
اصلاً التدوينة تحفة وانا بحبها :)
تحياتى

WINNER يقول...



الحسيني:

و انت طيب. و رمضان كريم علينا كلنا.

تدوينتي اختاروها للكتاب !
أول مرة أسمع الكلا ده. هروح أشوف ايه الحكاية.

مشرفنا و منورنا دايماً.
:)


سبحانك اللهم وبحمدك، أشهد ألا إله إلا أنت، أستغفرك وأتوب إليك